C.V. Òntsjpoard

Info

C.V. Òntsjpoard is ein vereniging in 't Smalste Stukje Nederland wo de vastelaovend veurop sjtuit! 15 mei 2008 höbbe weer de vereniging opgericht.

Geschiedenis

Òntsjpoard is ontsjtange op eine duustere maondigaovend in december. Zowie gebroekelik zoewe ein aantal leeje van ós weer get sjtömming gaon brénge op de jaorlikse Bontje Aovend van Sjötterie St. Petrus en Paulus Zöstere - Heide. ''Helaas wurt dea noe neet mieër georganiseerd''.

Natuurlik wurde bie ein van die aovendje auch mieër den ein glaeske beer getap en gedronke. Op ein augenblik koom Sven mit 't idee om eine vastelaoveswage te gaon boewe en daomit deil te numme aan d'n optoch in Zöstere. Door det we al get deeper in ut glaeske gekeke heije woort dit idee door jederein mit luid applaus ontvange.
Nao ut vastelaovesseizoen 2008 koome we veur ut ieërst bie ein op woonsdig 19 maart 2008 bie d'n Tunnelbar. Hiej woort veur ut ieërst serieus gebabbeld euver eine nuuje vastelaovesgroep dea ein meerwaarde moos gaon waere in ut vastelaovesgebeure van Zöstere. Neet sjnel hienao volgde weer ein bie einkomst wo we óze naam mooste gaon vastsjtélle.

Dit ging allemaol via ein ''egte'' verkeezing. D'r waore ein 9-tal ideën ingedeent, resp. C.V. Òntsjpoard, C.V. Gans Wildj, C.V. Rondj & Gezondj, C.V. Der einzame Hertzen, C.V. Net Neet, C.V. Leuk is Anges etc. wo jederein ein puntj aan koos geave. Oet eindelik moos de naam mit de meiste puntje winne. Nao veul pötjes beer koom mit kop en sjauwers hiej C.V. Òntsjpoard oet. Deze naam waor destieds ingedeent door Tom. Mer ut sjaonste agter deze naam is de gedachte durachter.

Weer höbbe leeje van den eine kantj van de tunnel en get leeje van de hei. Noe löp tusje dees twieë geweldige kerne ein grens en det is 't sjpoar. Wiejer zeet geer in ós logo die graote klok van de amelbergakérk teruuk komme. Die klok heije ze toen geklauwd en det wolle weer neet aan ós vonkelnüj logo veurbiej laote gaon. Zo kump auch in ut logo ós oprichtingsjaor nao veure, 15 mei 2008.